Ayuntamiento de Cerceda

Entre estes servizos atópanse os de mantemento e incremento de zonas verdes, iniciativas de educación ambiental, xestión axeitada de residuos, prevención de incendios ou promoción das enerxías alternativas. Dende a mesma área coordínanse tamén as licenzas de actividade e apertura, xa que o seu contido é fundamentalmente ambiental e sanitario.

En Cerceda existen multitude de zonas verdes deseñadas para o uso e gozo da cidadanía e das visitas que se acheguen a elas. Ademais do Xardín Botánico, existe unha gran zona verde no Acevedo, nas inmediacións da zona de ribeira do río Cabancos.

Tamén hai distintas áreas recreativas a carón dos ríos. Algunhas eran antigos depósitos de lixo, que foron recuperados e restaurados. Hoxe son zonas ben conservadas e respectuosas co contorno. As áreas recreativas naturais de Portabrea, Meirama, Xesteda e A Silva contan con mobiliario e servizos para gozar da natureza en primeira liña.

O municipio conta con instalacións específicas para a educación e formación ambiental, como é o caso do Ecomuseo de Cerceda. Este centro consta de dous andares en que o ambiente, a flora e a fauna de Cerceda adquiren o máximo protagonismo.

Entre os proxectos recentes destacan a nova Aula da Natureza e o Xardín Botánico de Cerceda, un amplo resumo da riqueza botánica e animal do contorno municipal. Ademais, o paseo fluvial do río Cabancos permite combinar unha actividade saudable coa observación da natureza.

O Concello promove tamén outras actividades a prol da conservación do medio, como o Concurso Recicla e os concursos de fotografía e debuxo ambiental.

As licenzas de actividade e apertura están ligadas legalmente. Isto quere dicir que, en caso de realización dunha obra, ambas as licenzas se tramitan xuntas no mesmo procedemento administrativo.

As licenzas de actividade regúlanse segundo o control ambiental ao que estean sometidas de acordo coa Lei1/1995 de protección ambiental. A clasificación sería a seguinte, de menor a maior protección:

• Licenza de actividades excluídas do procedemento de avaliación de incidencia ambiental (inocuas)
• Licenza de actividades sometidas á avaliación da incidencia ambiental
• Licenza de actividades sometidas ao estudo de efectos ambientais
• Licenza de actividades sometidas ao estudo de impacto ambiental
• Licenza de actividades sometidas á autorización ambiental integrada

A recollida de lixo en Cerceda é selectiva. Ademais da recollida de lixo xenérica, recóllense envases lixeiros (colector amarelo), papel e cartón (colectores azuis), vidro (colectores verdes) e mesmo se fai recollida domiciliaria de residuos voluminosos de forma mensual.

As plataformas de colectores soterrados fan que o depósito de residuos se realice do xeito máis cómodo para a poboación. Ademais, está previsto aplicar outros proxectos para mellorar os servizos, como a recollida porta a porta do papel e cartón que producen os pequenos comercios do concello.

Ademais, o punto limpo de Cerceda permítelles ás persoas usuarias depositar de forma separada diversos tipos de residuos: escombros, voluminosos férricos, plásticos, residuos vexetais, residuos perigosos e téxtiles, pneumáticos fóra de uso, residuos de aparellos electrónicos, etc. Atópase nas proximidades do parque empresarial do Acevedo e do Parque Acuático.

Este servizo desenvólvese nas datas previas á época estival. O seu obxectivo é previr os incendios forestais e os posibles danos que deles poidan derivar en zonas en que existan vivendas. Os traballos consisten principalmente en realizar rozas (mecanizadas e manuais), respectando os cultivos agrícolas e as especies vexetais protexidas pola lexislación vixente.

O Concello de Cerceda está a facer unha aposta cada vez máis decidida polas enerxías alternativas. A máis notoria pódese observar no parque acuático, que conta cunha estación de placas térmicas solares. Esta estación utilízase para aumentar a temperatura da auga do parque dunha forma totalmente sustentable. Ademais estanse a barallar proxectos similares, como a instalación dun aeroxerador e dunha horta solar fotovoltaica.