A Lei 3/2007 de prevención de incendios forestais, establece que se vostede é titular/propietario de solares ou parcelas situadas en solo urbano, urbanizable e núcleo rural, ten a obriga de mantelas nun axeitado estado de limpeza e coa masa vexetal desbrozada antes do día 31 de maio de cada ano e do seguinte xeito ...
A Feira das Nenas da Silva xa conta co seu programa oficial. Organizada polo Concello coa colaboración da Comisión de Festas Espíritu Santo da Silva e a Deputación, celebrarase os vindeiros 18 e 19 de abril cunha proposta chea de actividade, tradición e lecer para todos os públicos, coa feira cabalar como un dos seus grandes eixos.
O sábado 18 abrirá a festa ás 10:00 horas con bombas de palenque e un pasarrúas musical que marcará o inicio das celebracións. Ás 11:00 horas, unha degustación de feixós reunirá aos asistentes antes da inauguración oficial, prevista para as 13:00 horas a cargo do alcalde e outras personalidades. A sesión vermú arrincará ás 14:00 horas.
Pola tarde, A Silva encherase de actividade con paseos en carruaxe e poni para nenos e nenas, obradoiros infantís de pintacaras e globoflexia e exhibicións de enduro. O programa complétase co torneo de xadrez ‘Feira das Nenas’, a actuación da coral Voces Veteranas de Culleredo ás 17:00 horas e, ás 18:00 horas, coa exhibición da escola de ximnasia rítmica do colexio Celso Emilio Ferreiro.
Á noite elevarase o ritmo coa actuación da Orquestra Panorama, acompañada da discomóbil Impacto e DJ Bermúdez.
O domingo 19 comezará ás 10:00 horas coa feira tradicional e un pasarrúas da charanga Os Atrevidos, seguido da ruada de AC Folque Ruada. Ás 13:00 horas, unha degustación de bolos preñados abrirá paso á sesión vermú das 14:00 horas co Grupo Tania Veiras.
Ás 18:00 horas, Laura Añón e Fran Cañotas conducirán a presentación da Parella da Feira das Nenas 2026, momento no que tamén se entregarán os premios da feira cabalar. A verbena iniciarase ás 19:00 horas co Grupo Tania Veiras e a Orquestra New York, nunha noite que incluirá unha sesión de fogos de artificio ás 22:00 horas.
Durante toda a fin de semana, o recinto contará cunha exhibición de escultura en madeira con motoserra a cargo de Eugenio Linares, unha carpa de exposicións multisectorial e polbeiras.
FEIRA CABALAR
En paralelo, o domingo desenvolverase a clásica feira cabalar, na que os participantes competirán nas modalidades de andadura galega, tanto serrada como chapeada. O programa inclúe tamén unha xincana, un concurso morfofuncional de poldros e unha exhibición de andadura de cabalo marchador galego.
O alcalde, Juan Manuel Rodríguez, subliña que a Feira das Nenas “é unha das citas máis relevantes do calendario festivo local”. Neste sentido, o rexedor incide na “importancia de manter as feiras tradicionais” e convida a veciñanza a achegarse á Silva para participar e gozar deste fin de semana de celebración.
O Club Natación Cerceda e o Concello organizan o III Trofeo de Salvamento e Socorrismo “Concello de Cerceda”, que se celebrará o vindeiro 11 de abril coa colaboración da Federación de Salvamento e Socorrismo de Galicia (FESSGA). Ao acto de presentación celebrado este mércores asistiron o alcalde, Juan Manuel Rodríguez; o concelleiro de Deportes, Óscar Golán, e Ana Gende, directiva do club.
A terceira edición desta cita desenvolverase na Piscina Municipal, co inicio das probas competitivas previsto para as 10:00 horas da mañá. Participarán nadadoras e nadadores de categoría infantil, cadete e absoluta, e mediranse en modalidades como remolque de manequín, natación con aletas ou socorrista mixto, dependendo da idade.
As inscricións están abertas aos membros do Club de Natación de Cerceda, e aos integrantes doutros clubs galegos que tamén desexen participar. Deben formalizarse na aplicación web da FESSGA antes do 8 de abril por un custo de 2 euros.
O alcalde destacou que “na pasada edición chegamos ao cento de participantes, o que demostra o interese pola proba tanto en Cerceda como en clubes doutras localidades”. Así mesmo, subliñou a importancia de competir na casa, sinalando que “para os nosos deportistas é unha oportunidade moi especial poder medirse diante da súa xente”. Neste sentido, o alcalde convidou “a deportistas, familias, e veciñanza a gozar desta xornada de deporte, sexan de Cerceda ou doutros concellos”.
A Unidade Móbil 02 de inspección técnica de TURISMOS desplazarase ao Concello de CERCEDA nas seguintes datas e ubicacións:
- Do 06/05/2026 ao 08/05/2026 Entrada Aquapark (Cerceda).
O horario de atención será de 9:00 a 13:30 pola mañá, e de 15:15 a 18:00 pola tarde. O servizo prestarase en horario de mañán e tarde todos os días, agás:
- 08/05/2026 que será horario só de mañá.
Para solicitar cita previa:
- Por teléfono: 981 92 80 80
- A través da nosa páxina web: www.sycitv.com - Cita previa.
O próximo día 28/04/2026 farase unha nova recollida de plástico agrícola nas diferentes explotación agrícolas e gandeiras do Concello de Cerceda.
O procedemento para solicitar a recollida é o seguinte:
1. Os interesados deben chamar ao 881 04 67 76 para solicitar o servizo indicando a cantidade a recoller e os datos do punto de recollida.
2. O plástico debe estar nun lugar que sexa accesible para o camión encargado da carga con grúa, nun único punto de carga dentro da explotación.
3. O plástico debe estar limpo, sen residuos e atado en fardos (senón é así non se poderá efectuar a recollida)
O Viveiro de Empresas de Cerceda acolleu este luns a xornada “Conectando Persoas, Empresas e Emprego”, unha cita que reuniu empresas e persoas na procura de novas oportunidades laborais. O obxectivo foi fomentar o contacto directo e mellorar a empregabilidade no territorio.
No evento participaron representantes da Asociación de Empresarias Rurais (ASER), Grupo Cercedasol, Leyma, Grupo Malasa, Reneymar e Sogama, que trasladaron aos asistentes as súas necesidades de contratación e recomendacións para acceder ao mercado laboral nun contexto cada vez máis competitivo e cambiante.
Tamén asistiu o alcalde de Cerceda, Juan Manuel Rodríguez, quen agradeceu a colaboración entre axentes sociais para organizar iniciativas coma a deste luns, “beneficiosas para todas e para todos”. O alcalde subliñou a “aposta” do Concello por xerar postos de traballo: “Cando falamos de emprego, é fundamental o impulso das empresas, pero desde logo, que a Administración dea a man”.
Pola súa parte, a Confederación de Empresarios da Coruña destacou a boa acollida da xornada e o valor deste tipo de encontros para achegar empresas e talento. A representación empresarial detallou as necesidades das súas compañías en materia de recursos humanos, afondando nos perfís profesionais que precisan cubrir, en como participar nos procesos de selección e na formación que poden levar a cabo para incorporarse ao mercado laboral, unha cuestión clave para poder acceder a postos de traballo cualificado.
O programa ActivaVerde é un proxecto para mellorar a empregabilidade das persoas afectadas polo peche das centrais de Meirama e As Pontes, ofrecéndolles orientación, formación e acompañamento personalizado. Está financiado nun 70 % pola Unión Europea no marco do programa dos Fondos de Transición Xusta para España 2021-2027, e xestionado pola Xunta en colaboración con axentes sindicais e empresariais. Nel poden participar as persoas, empregadas ou desempregadas, afectadas polo peche das centrais térmicas e residentes na provincia da Coruña.
Ao remate do encontro, habilitouse un espazo de networking para favorecer o intercambio directo entre empresas e asistentes e, deste xeito, xerar unha contorna propicia para o establecemento de contactos profesionais e detectar posibles oportunidades de emprego.
O Concello de Cerceda chama á colaboración veciñal para detectar as zonas do municipio que carecen de cobertura 4G e 5G. A Secretaría de Estado de Telecomunicacións e Infraestruturas Dixitais (SETID) vén de lanzar dúas novas consultas públicas relacionadas co despregamento deste tipo de redes móbiles no rural, e unha delas afecta a Cerceda.
Segundo a cartografía facilitada polo organismo estatal, o municipio figura con cobertura integral en todo o seu territorio. Non obstante, os servizos municipais constataron que esta situación non se corresponde coa realidade, existindo aínda puntos sen acceso axeitado.
Por este motivo, o Concello promove unha consulta pública para identificar aquelas zonas sen cobertura móbil 4G/5G e que, polo tanto, poderían beneficiarse das futuras axudas destinadas á mellora das telecomunicacións no rural.
Neste sentido, faise un chamamento á axuda da veciñanza. Todas aquelas persoas residentes ou con actividade empresarial en Cerceda que non dispoñan de cobertura móbil 4G/5G no exterior dos seus inmobles (non se teñen en conta problemas de cobertura en interiores) poden comunicalo chamando ao teléfono 981 685 001 (extensión 2025) e facilitando o seu enderezo, co obxectivo de que o persoal técnico efectúe as comprobacións oportunas.
O prazo para a recollida destas incidencias remata o vindeiro 12 de abril, posto que o 13 de abril finaliza o período para que o Concello presente as alegacións correspondentes ante a SETID.
O Concello de Cerceda lembra que nos últimos anos xa se teñen desenvolvido distintas actuacións para mellorar a conectividade no municipio, como a cesión da rede eléctrica municipal para estender a fibra óptica ou a colaboración en programas impulsados por outras administracións. Con esta iniciativa, o goberno municipal trata de garantir que toda a veciñanza dispoña dun acceso digno e de calidade ás telecomunicacións. Dende o Concello agradécese de antemán a colaboración cidadá para que ningún punto do municipio quede sen cobertura.
Espina y Delfín vai a realizar o corte no suministro o vindeiro mércores día 25 de marzo entre as 9:00 e as 13:00 horas, motivado por melloras na rede de abastecemento.
Zonas afectadas: Esperón, Meirama, Seoane, Piñeiro, A Cortella e zonas rurais anexas.
Dende o 15 de marzo ao 15 de abril de 2026 está aberto o prazo de solicitude de renovación e praza nova na escola infantil "Os Pillabáns" para o curso 2026/2027.
A documentación precisa que se debe de adxuntar xunto co modelo de solicitude é a que se acompaña no anexo. Esta documentación debe ser presentada na Sede Electrónica do concello, no Rexistro Xeral ou en Servizos Socias do concello, en horario de 9.00horas a 14.00horas.
Máis información no Departamento de Servizos Sociais ou no teléfono 981 68 60 68
>>> Iniciar o trámite na sede electrónica
>>> Descargar formularios
Solicitude nova praza na escola infantil
Solicitude renovación praza na escola infantil
Tal e como lle foi comunicado ao seu Concello, tras o inicio do servizo de telefonía móbil de nova xeración (4G e 5G) na zona, podían producirse afectacións na recepción de televisión dixital terrestre (TDT).
Para solucionar estas afectacións e garantir que a posta en servizo das estacións base de telefonía móbil non afecte á TDT, a entidade LLEGA700 leva a cabo as actuacións técnicas necesarias nas instalacións de recepción dos usuarios de TDT. Estas actuacións son de carácter gratuíto para os cidadáns afectados.
De acordo á Orde Ministerial1 que regula este proceso, o prazo para solicitar as actuacións en caso de afectación por parte dos usuarios de TDT, é de seis meses desde a data de posta en servizo das estacións de telefonía móbil.
Mediante a presente comunicación informámoslle que está a piques de finalizar o prazo habilitado de 6 meses, desde o aceso dunha ou varias das estacións que afectan o seu municipio, para resolver incidencias na recepción da TDT sen custo para os cidadáns.
Non obstante o anterior, infórmase que o 31-03-2026, finalizará definitivamente o prazo para solicitar as actuacións gratuítas, por parte dos usuarios da TDT, polas posibles afectacións ocasionadas polos nodos de 4G e 5G.
No futuro, no seu municipio poderíanse acender novas estacións base de telefonía móbil, se así o considerasen necesario os operadores para mellorar este servizo, nese caso volveríase a informar o seu Concello e atenderíanse de forma gratuíta as incidencias que se producisen, abríndose un novo prazo de seis meses desde a data de aceso.
En caso de calquera dúbida ou de requirir información máis detallada sobre as estacións do seu municipio pode chamar ao teléfono gratuíto da Oficina Técnica de Concellos de LLEGA700, 900 831 902, onde se lle facilitará toda a información referente ás posibles afectacións ocasionadas por estacións base de telefonía móbil no seu municipio ou en municipios lindeiros.
Lembramos que para poder atender no centro de atención ao usuario e poder resolver as incidencias, terán que comunicarse ao teléfono gratuíto 900 833 999.
