O Concello de Cerceda porá en marcha nas vindeiras semanas os traballos de limpeza de cunetas na contorna da Baixa e as melloras de saneamento en Piñeiro, que contarán cun orzamento de máis de 35.000 euros e preténdese con estas facer un mellor tratamento das augas pluviais e ampliar a rede do servizo de saneamento neste núcleo de poboación. 

Respecto á primeira, a intención do goberno municipal é realizar unha mellora integral nas cunetas coa súa limpeza nas principais entradas da Baixa de Cerceda, tanto na estrada que parte do cemiterio da igrexa de Cerceda como a do Esperón, confluíndo na Ponte Cristina e na zona do Carballal. Proxéctase a habilitación das zonas máis afectadas mediante formigón para dar solución ao tema das augas pluviais nas zonas máis afectadas e que suporá, en todo caso, unha mellora estrutural na zona. 

En segundo termo, proxéctase ampliar a rede de saneamento en Piñeiro mediante 640 metros de tubaxes de PVC e 12 pozos de rexistro en calzada, previa escavación de zanxa e demolicións de pavimento. Reporase este en zahorra, formigón e aglomerado. 

O alcalde, Juan Manuel Rodríguez, sinala que “buscamos adiantar a solución a un problema estacionario como son as augas de escorrentía, que poden provocar situacións indesexadas na rede de estradas municipal, que agardemos queden solucionadas con estas intervencións nos puntos de entrada á Baixa de Cerceda”.

O Concello de Cerceda beneficiouse da convocatoria de Axudas a proxectos de enerxía fotovoltaica, para o ano 2021-2022, cofinanciada polo Fondo Europeo de Desenvolvemento Rexional, no marco do Programa Operativo Feder Galicia 2014-2020.

Nesta convocatoria executouse o proxecto de Instalación fotovoltaica de autoconsumo de 17KW nominais no Centro Cívico de Cerceda

Cada unha das instalacións ten un custo elixible de 17.278,80 euros, é axuda o Inega, con fondos FEDER, ascendiu a 13.823,04 euros..../...

Ver ou descargar documento completo (pdf)

O Concello de Cerceda creará unha senda peonil para conectar o núcleo urbano co centro médico para continuar mellorando as conexións e prestar mellores servizos á veciñanza. A Administración local sacou a licitación un paquete de intervencións por un valor de 109.319,12 euros con cargo ao Plan Complementario da Deputación da Coruña, entre as que se encontran as melloras nun camiño na zona dos eólicos ata o límite municipal, nas beirarrúas do Museo do Moucho e no acceso a Recegulfe, ademais da xa mencionada. O prazo de presentación de ofertas remata o 3 de outubro de 2022.

Dentro do compendio de obras que saca a contratación o Concello, sen dúbida a de maior calado é a que comunicará o núcleo de Cerceda co centro de saúde a través dunha senda peonil de 200 metros de lonxitude e 2 metros de ancho na marxe dereita. Contémplase tamén o retranqueo de 180 metros de pechamento de postes de formigón e arame.

Tamén se pretende mellorar unha vía municipal na zona dos eólicos, nun total de 1200 metros, cun asfaltado de 15 centímetros, así como a apertura de gabias, limpeza de salvagabias e a colocación dunha franxa de formigón para o correcto drenaxe lonxitudinal e transversal. 

Crearanse tamén beirarrúas na contorna do Museo do Moucho, un dos espazos culturais máis senlleiros do municipio. Executaranse en baldosa para dar un servizo do que carecía o municipio ata o momento.

O acceso ao lugar de Recegulfe executarase nunha lonxitude de 250 metros e 3,50 metros de ancho, cunha mellora da capa de rodaxe de 6 centímetros, reparando previamente os baches e perfilando as mordentes con grava. Mellorarase tamén o entronque coa apertura dun sobre ancho nunha superficie de 50 metros cadrados, que se pavimentará con 15 centímetros de grava. Pintaranse tamén as marcas viais.

O alcalde, Juan Manuel Rodríguez, resaltou que “ca ampliación no acceso ao CPI O Cruce moi avanzada, agora buscamos mellorar a seguridade na estrada que vai ao centro médico de Cerceda, outra edificación pública de gran trascendencia para a vida das persoas. Este mandato vai supoñer para o pobo un avance moi grande en materia de accesibilidade”.

O Concello de Cerceda despediu a tempada de apertura do Aquapark 2022 rexistrando o terceiro mellor verán en dez anos no que afluencia de público se refire, con 140.000 visitantes. Os días de máis afluencia resultaron o 10 de xullo, con 5.100 persoas usuarias; e o 9 de agosto, con 5.775 visitantes.

“Os números terían sido mellores si as condicións meteorolóxicas fosen favorables durante a segunda quincena de agosto”, admiten desde o Concello, aínda destacando “o balance positivo tras unha tempada que comezou con moitas incertezas, sendo a primeira posterior á pandemia”. 

A instalación recuperou as visitas escolares, campamentos, viaxes organizadas desde os diferentes municipios da comunidade galega, e tamén as actividades deportivas propias da programación estival municipal, a través do Verán Saudable.

O alcalde, Juan Manuel Rodríguez, agradeceu “a implicación das persoas responsables para que o Aquapark de Cerceda continúe a ser unha instalación referente na comarca”, e sinalou que “toca agora traballar para preparar a tempada 2023 e acoller a todas as persoas que así o desexen poidan desfrutar no noso Aquapark”.

O Concello de Cerceda vén de rematar os traballos de aglomerado nunha pista de Rodís, no lugar de Vilamenán, intervención que contou cun orzamento de 36.215,95 euros. 

Trátase doutra das obras en virtude da mellora das conexións inter parroquiais, á vez que se optimiza a seguridade viaria na contorna. Faltan as tarefas de sinalización e pintado das liñas divisorias, que se executarán nos vindeiros días, en canto deixe de chover. 

Interviuse nun total de 375 metros de lonxitude, nunha vía que conta con 3,80 metros de ancho. Está contemplada unha cuneta de 100 metros, revestida de formigón, baixo a que se canalizará un tubo para recollida de pluviais, xunto con 4 arquetas con sumidoiro. 

O alcalde, Juan Manuel Rodríguez, insiste en que “isto vai na liña da importante aposta inversora para dotar ao mapa de estradas e vías municipais das mellores condicións para que a veciñanza as poida empregar”. 

O Concello de Cerceda rematou os traballos de saneamento e da creación dunha senda peonil en Xesteda, intervencións que contaron cun orzamento total de 484.913,84 euros.

No caso da rede de saneamento, parte das intervencións contaron con fondos municipais e parte provinciais. No tramo de Xesteda ata o núcleo de A Picota, executáronse 274 metros de canalización en tubaxe, previa execución das gabias, e a instalación de 7 pozos de rexistro. As obras completáronse coas reposicións dos pavimentos afectados. O Concello investiu 56.408,67 euros. 

Por outra banda, tamén se ampliou a rede desde Xesteda ata o cruce cara Londoño, estendendo este servizo en 735 metros de canalizacións e tamén coa instalación de 14 pozos de rexistro. Tamén incluíron as reposicións de pavimentos afectados. Con cargo ao Plan Único, a Deputación da Coruña aportou 55.126 euros.

En total, máis dun quilómetro de rede de saneamento completamente renovada, que se unen aos 24 pozos de rexistro instalados. 

Por outra banda, tamén tivo lugar a creación dunha senda peonil neste núcleo, en dous tramos. O primeiro unía O Acevedo co Pao do Lobo e co Uval, rematada hai varios meses. Ten unha lonxitude de 1250 metros, e un ancho de 2 metros.

Fai unha semana que se finalizaron as intervencións entre A Picota e o Campo da Festa de Xesteda, na estrada DP-2403, e ambas contaron cun importe de 373.379,17 euros. Esta última ten unha lonxitude de 750 metros cunha anchura de 2 metros. O pavimento conta de 20 centímetros de zahorra artificial e 15 centímetros de formigón coloreado con malla electrosoldada. Tamén se instalaron bancos de pedra e árbores. 

O alcalde, Juan Manuel Rodríguez, afirma que “estes traballos contribúen a afianzar Cerceda como referente de cara a fomentar as posiblidades de tránsito peonil en materia de mobilidade non motorizada”.

O Concello de Cerceda adxudicou a rehabilitación enerxética do Museo do Moucho por 165.224, 74 euros. O alcalde de Cerceda, Juan Manuel Rodríguez, visitou esta mañá os traballos dun dos “edificios senlleiros do noso municipio”.

Actuarase sobre as fachadas para incrementar o aillamento térmico e a ganancia térmica solar. Executarase colocando placas de bordo escalonado co respectivo morteiro e cor, e na planta baixa realizarase unha fachada ventilada cun aplacado pétreo para protexer mecanicamente a estrutura.

Substituiranse tamén as carpinterías de aluminio, sen rotura de ponte térmica, por outras novas que conseguirán un aforro notable no sistema de calefacción do Museo.

En termos de certificación enerxética, a calificación final do proxecto mellora en dúas letras ás do edificio existente, actuando sobre a demanda global e a eficiencia do sistema de climatización. Pasará dunha clasificación C a A.

O alcalde, Juan Manuel Rodríguez, destaca os traballos como “moi necesarios non só para mellorar a estética e habitabilidade, senón para facelo máis confortable para as persoas que traballan aquí e para todas aquelas persoas que empregan o edificio. Os noso maiores, que merecen as mellores condición posibles, as pesroas que fan uso da planta media para distintas actividades, e as e os visitantes. A redución nos niveis de huimidade, por exemplo, vai ser significativa”.