O Concello de Cerceda puxo en funcionamento a ampliación da Escola Infantil Municipal Os Pillabáns, unha actuación que permite incrementar a capacidade do centro, dar resposta á demanda existente e eliminar a listaxe de agarda nas matrículas.

A intervención consistiu en construír unha nova aula de 70 metros cadrados. Este mesmo luns xa foi empregada polos nenos e nenas de 1 a 3 anos da escola, que fixeron uso dos distintos xogos e entretementos didácticos á súa disposición no novo espazo. Ademais, conta cunha nova e moderna zona de hixiene para o alumnado.

A mellora permite ampliar a oferta do servizo, chegando ata arredor de 60 prazas. O investimento total ascendeu a 103.000 euros achegados polo Concello de Cerceda, aos que se suman 80.000 euros de financiamento da Xunta de Galicia.

O alcalde de Cerceda, Juan Manuel Rodríguez; a tenente de alcalde e concelleira de Benestar Social e Igualdade, Catrina Queijo, e a concelleira de Educación, Cristina Capelán, visitaron as novas instalacións no seu primeiro día en activo.

O rexedor subliñou a importancia dunha actuación que, lembrou, era un dos proxectos máis significativos que se estaban a acometer actualmente. “Estamos enormemente satisfeitos. Fundamentalmente, porque isto cumpre un compromiso importante deste mandato, que era a ampliación da Escola Infantil Municipal”, sinalou.

Rodríguez subliñou a aposta do Concello por manter este servizo básico baixo xestión municipal, dentro das políticas sociais do goberno municipal para favorecer a natalidade e a conciliación.

Neste sentido, recalcou as últimas estatísticas demográficas. “Hai uns datos respecto á natalidade en Cerceda moi positivos no último lustro”, apuntou, engadindo que o Concello traballa “humildemente por favorecer esa dinámica con axudas á natalidade, apoio educativo e medidas de conciliación que van máis alá das competencias propias”.

Entre estas iniciativas citou “o Bos Días Cole ou a ampliación da oferta de campamentos e as actividades culturais e deportivas, con melloras progresivas, máis espazos e maior cantidade”, que contribúen a facilitar a vida das familias do municipio.

O alcalde avanzou ademais que, de continuar esta tendencia demográfica, o Concello estudará novas expansións deste servizo público: “Se a natalidade segue incrementándose, a nosa aposta será a medio prazo crear outro espazo educativo que dea resposta a esa demanda”.

Axudas á natalidade

No marco destas políticas, o Concello mantén aberta a convocatoria de axudas á natalidade, cun importe de 300 euros por unidade familiar. Están destinadas a nacementos, adopcións ou acollementos producidos entre o 1 de novembro do ano pasado e o 30 de outubro deste ano.

O prazo de solicitude permanece aberto ata o 30 de novembro, podendo tramitarse no Rexistro do Concello ou a través da sede electrónica, sede.cerceda.es.

O Concello de Cerceda, no marco do seu plan de mellora de infraestruturas municipais, continúa a impulsar diversas actuacións na parroquia de Meirama co obxectivo de reforzar os servizos e equipamentos dispoñibles para a veciñanza. O alcalde, Juan Manuel Rodríguez, visitou os traballos en curso acompañado pola tenente de alcalde, Catrina Queijo, e polo concelleiro de Medio Rural, Ángel Gestal.

Unha das intervencións máis destacadas está a desenvolverse na antiga escola unitaria da parroquia, onde se está a executar un proxecto de mellora de eficiencia enerxética para acondicionar o local social. As actuacións inclúen a substitución da cuberta por tella nova, a colocación de illamento térmico exterior, a instalación dunha bomba de calor aire-aire, a renovación da iluminación mediante tecnoloxía LED e a implantación dun sistema de monitorización do consumo eléctrico.

O investimento nesta obra ascende a 65.536,41 euros que redundarán nun beneficio social. O rexedor destacou que “vai mellorar o confort das persoas que empregan o espazo” e que se trata “dun lugar que aglutina moita actividade a nivel social, que dinamiza a parroquia, polo que no rural é fundamental darlle ese impulso”.

Por outra banda, Meirama contará proximamente cunha nova estación depuradora de augas residuais. A infraestrutura de tratamento atópase xa finalizada, á espera da súa conexión á rede eléctrica. Esta actuación supuxo un investimento próximo aos 190.000 euros, nun contrato que inclúe tamén, de forma complementaria, a execución dunha canalización de saneamento na zona de Ribasoutas, na parroquia de Cerceda.

Ademais, os representantes do goberno municipal comprobaron o estado do estacionamento da igrexa, que xa se levaba empregando de xeito funcional os últimos anos e que agora será foco dunha segunda fase de actuación. A mellora, desenvolvida ao abeiro dun convenio co Arcebispado, incluirá a humanización do espazo mediante a creación dunha zona axardinada con árbores e mobiliario urbano. Está previsto que os traballos comecen en breve.

Sobre este proxecto, Juan Manuel Rodríguez indicou que, “aínda que se estaba empregando de maneira provisional, existía unha necesidade de mellora e un potencial que imos facer realidade con esta intervención”. Así mesmo, remarcou a mellora na mobilidade peonil coa senda executada ao comezo do mandato, en 2023.

O alcalde destacou o conxunto destas actuacións, que cualificou de “importantes”, e asegurou que “non irán enfrontadas con outras obras ou actuacións que estamos planificando na parroquia”, ao tempo que incidiu en que “Meirama é unha parroquia que ten potencial para mellorar e a nosa intención é, paso a paso, ir dándolle ese avance”.

O programa ven a reforzar a cobertura de alimentos e/ou asistencia de material básica.

Poden solicitalo familias con menores de 18 anos a cargo que se atopen por debaixo do limiar da pobreza severa.

As tarxetas so funcionan nos establecementos colaboradores.

Fotografía: Táboa de cálculo de ingresos por unidade de consumo inferiores ao 40% da renda media nacional segundo o tipo de fogar.

Información Servizos Sociais 981 68 60 68

Con data 21 de abril foron publicadas no Boletín Oficial da Provincia da Coruña nº73 as bases da convocatoria das axudas ao fomento da natalidade e para o asentamento poboacional do Concello de Cerceda para a anualidade 2026.

Esta convocatoria ten por obxecto establecer as bases das axudas económicas ás familias do Concello de Cerceda, co obxecto de impulsar estratexias para fixar e fomentar o aumento da poboación municipal e o seu rexuvenecemento, evitando o despoboamento rural.

Poderán ser persoas beneficiarias destas axudas os proxenitores ou, no seu caso, as familias acolledoras dos menores nacidos, adoptados ou acollidos entre o 1 de novembro do ano 2025 e o 30 de outubro do ano 2026.

Para máis información no Departamento de Servizos Sociais ou no teléfono 981 686 068

PUBLICACION BOP

MODELO DE SOLICITUDE 

Attachments:

File
SOLICITUDE.pdf

Cerceda acollerá o vindeiro 16 de maio a quinta edición da Poseidon Race, unha carreira de obstáculos (OCR) organizada polo club OCR Cerceda coa colaboración do Concello e da Deputación da Coruña. Este mediodía tivo lugar o acto de presentación da proba, ao que asistiron o alcalde de Cerceda, Juan Manuel Rodríguez; o concelleiro de Deportes, Óscar Golán, e o presidente da entidade deportiva, Álvaro Sánchez.

A organización agarda unha participación de preto de 800 persoas, consolidando a cita como unha das máis destacadas do calendario nacional e europeo. A competición inclúe as categorías Elite, Starter, Popular Parellas e Popular Party. As carreiras comezarán ás 14:00 horas coa saída da categoría Elite, rematando arredor das 20:00 horas coa entrega de premios das categorías populares.

A competición desenvolverase no Aquapark de Cerceda e nas súas inmediacións, un escenario que reforza o atractivo do evento ao combinar as instalacións acuáticas coa contorna natural.

A categoría Elite afrontará un percorrido de 10 quilómetros, mentres que as categorías Starter e Popular completarán 8 quilómetros, con arredor de 70 obstáculos ao longo do circuíto. Nas categorías populares estímase a participación de máis de 500 persoas, nun formato que fomenta o traballo en equipo ao permitirse a axuda entre competidores.

Inscricións e participantes

As persoas interesadas en inscribirse poden apuntarse na páxina web www.ccnorte.com. A recollida de dorsais terá lugar o propio día do evento, na zona de saída, a partir das 12:00 horas.

Está prevista a participación de atletas de numerosos países, entre eles Portugal, Venezuela, Colombia, Estonia, Bélxica, Dinamarca, Francia, Panamá, Chequia, Letonia, Polonia, Suíza ou Italia. De feito, a Poseidon Race será puntuable para as ligas Nacional AOCO, North Finals e para a clasificatoria do campionato do mundo OCRWC, o que dá mostra da súa relevancia.

O alcalde de Cerceda agradeceu o traballo do club e destacou a “total disposición” do Concello a apoiar citas deportivas como a Poseidon Race, que “contribúen a promover o deporte e a poñer en valor espazos como o Aquapark, ademais de proxectar Cerceda a nivel nacional e internacional”.

Pola súa banda, desde o club tamén agradeceron o apoio do Concello e da Deputación, “sen os que sería imposible celebrar un evento desta magnitude”.

O Club Natación Cerceda e o Concello organizan o III Trofeo de Salvamento e Socorrismo “Concello de Cerceda”, que se celebrará o vindeiro 11 de abril coa colaboración da Federación de Salvamento e Socorrismo de Galicia (FESSGA). Ao acto de presentación celebrado este mércores asistiron o alcalde, Juan Manuel Rodríguez; o concelleiro de Deportes, Óscar Golán, e Ana Gende, directiva do club.

A terceira edición desta cita desenvolverase na Piscina Municipal, co inicio das probas competitivas previsto para as 10:00 horas da mañá. Participarán nadadoras e nadadores de categoría infantil, cadete e absoluta, e mediranse en modalidades como remolque de manequín, natación con aletas ou socorrista mixto, dependendo da idade.

As inscricións están abertas aos membros do Club de Natación de Cerceda, e aos integrantes doutros clubs galegos que tamén desexen participar. Deben formalizarse na aplicación web da FESSGA antes do 8 de abril por un custo de 2 euros.

O alcalde destacou que “na pasada edición chegamos ao cento de participantes, o que demostra o interese pola proba tanto en Cerceda como en clubes doutras localidades”. Así mesmo, subliñou a importancia de competir na casa, sinalando que “para os nosos deportistas é unha oportunidade moi especial poder medirse diante da súa xente”. Neste sentido, o alcalde convidou “a deportistas, familias, e veciñanza a gozar desta xornada de deporte, sexan de Cerceda ou doutros concellos”.

O próximo día 28/04/2026 farase unha nova recollida de plástico agrícola nas diferentes explotación agrícolas e gandeiras do Concello de Cerceda.

O procedemento para solicitar a recollida é o seguinte:

1. Os interesados deben chamar ao 881 04 67 76 para solicitar o servizo indicando a cantidade a recoller e os datos do punto de recollida.
2. O plástico debe estar nun lugar que sexa accesible para o camión encargado da carga con grúa, nun único punto de carga dentro da explotación.
3. O plástico debe estar limpo, sen residuos e atado en fardos (senón é así non se poderá efectuar a recollida)

O Viveiro de Empresas de Cerceda acolleu este luns a xornada “Conectando Persoas, Empresas e Emprego”, unha cita que reuniu empresas e persoas na procura de novas oportunidades laborais. O obxectivo foi fomentar o contacto directo e mellorar a empregabilidade no territorio.

No evento participaron representantes da Asociación de Empresarias Rurais (ASER), Grupo Cercedasol, Leyma, Grupo Malasa, Reneymar e Sogama, que trasladaron aos asistentes as súas necesidades de contratación e recomendacións para acceder ao mercado laboral nun contexto cada vez máis competitivo e cambiante.

Tamén asistiu o alcalde de Cerceda, Juan Manuel Rodríguez, quen agradeceu a colaboración entre axentes sociais para organizar iniciativas coma a deste luns, “beneficiosas para todas e para todos”. O alcalde subliñou a “aposta” do Concello por xerar postos de traballo: “Cando falamos de emprego, é fundamental o impulso das empresas, pero desde logo, que a Administración dea a man”.

Pola súa parte, a Confederación de Empresarios da Coruña destacou a boa acollida da xornada e o valor deste tipo de encontros para achegar empresas e talento. A representación empresarial detallou as necesidades das súas compañías en materia de recursos humanos, afondando nos perfís profesionais que precisan cubrir, en como participar nos procesos de selección e na formación que poden levar a cabo para incorporarse ao mercado laboral, unha cuestión clave para poder acceder a postos de traballo cualificado.

O programa ActivaVerde é un proxecto para mellorar a empregabilidade das persoas afectadas polo peche das centrais de Meirama e As Pontes, ofrecéndolles orientación, formación e acompañamento personalizado. Está financiado nun 70 % pola Unión Europea no marco do programa dos Fondos de Transición Xusta para España 2021-2027, e xestionado pola Xunta en colaboración con axentes sindicais e empresariais. Nel poden participar as persoas, empregadas ou desempregadas, afectadas polo peche das centrais térmicas e residentes na provincia da Coruña.

Ao remate do encontro, habilitouse un espazo de networking para favorecer o intercambio directo entre empresas e asistentes e, deste xeito, xerar unha contorna propicia para o establecemento de contactos profesionais e detectar posibles oportunidades de emprego.

O Concello de Cerceda chama á colaboración veciñal para detectar as zonas do municipio que carecen de cobertura 4G e 5G. A Secretaría de Estado de Telecomunicacións e Infraestruturas Dixitais (SETID) vén de lanzar dúas novas consultas públicas relacionadas co despregamento deste tipo de redes móbiles no rural, e unha delas afecta a Cerceda.

Segundo a cartografía facilitada polo organismo estatal, o municipio figura con cobertura integral en todo o seu territorio. Non obstante, os servizos municipais constataron que esta situación non se corresponde coa realidade, existindo aínda puntos sen acceso axeitado.

Por este motivo, o Concello promove unha consulta pública para identificar aquelas zonas sen cobertura móbil 4G/5G e que, polo tanto, poderían beneficiarse das futuras axudas destinadas á mellora das telecomunicacións no rural.

Neste sentido, faise un chamamento á axuda da veciñanza. Todas aquelas persoas residentes ou con actividade empresarial en Cerceda que non dispoñan de cobertura móbil 4G/5G no exterior dos seus inmobles (non se teñen en conta problemas de cobertura en interiores) poden comunicalo chamando ao teléfono 981 685 001 (extensión 2025) e facilitando o seu enderezo, co obxectivo de que o persoal técnico efectúe as comprobacións oportunas.

O prazo para a recollida destas incidencias remata o vindeiro 12 de abril, posto que o 13 de abril finaliza o período para que o Concello presente as alegacións correspondentes ante a SETID.

O Concello de Cerceda lembra que nos últimos anos xa se teñen desenvolvido distintas actuacións para mellorar a conectividade no municipio, como a cesión da rede eléctrica municipal para estender a fibra óptica ou a colaboración en programas impulsados por outras administracións. Con esta iniciativa, o goberno municipal trata de garantir que toda a veciñanza dispoña dun acceso digno e de calidade ás telecomunicacións. Dende o Concello agradécese de antemán a colaboración cidadá para que ningún punto do municipio quede sen cobertura.