A veciñanza de Cerceda está máis preto da administración dixital dende este martes. O Viveiro de Empresas acolleu a xornada ‘A Administración, preto de ti’, organizada pola Subdelegación do Goberno na Coruña en colaboración co Concello de Cerceda.

Na formación, conducida por empregados públicos da Subdelegación, os asistentes escoitaron unha exposición das posibilidades que ofrece a Administración electrónica, repasando os trámites e xestións máis habituais. Tamén puideron formular as súas dúbidas, obter cadanseu certificado dixital e recibir consellos de ciberseguridade.

Na presentación interviñeron o alcalde de Cerceda, Juan Manuel Rodríguez; o subdelegado do Goberno na Coruña, Julio Abalde, e a concelleira de Benestar Social, Igualdade e Comunicación, Catrina Queijo.

O rexedor destacou que o lema da actividade “explica a filosofía deste acto”. Lembrou que o Concello “sempre pode exercer como enlace” coas institucións en determinadas materias, pero que onde non pode intervir, a Administración electrónica é de gran utilidade para o cidadán. Por iso, salientou que “como Concello sempre estamos a favor deste tipo de iniciativas. Temos as portas abertas”.

Pola súa parte, o subdelegado sinalou que actualmente se pode “acceder a practicamente todos os trámites no móbil” e subliñou o esforzo do Goberno neste tipo de iniciativas, que ofrecen á cidadanía a posibilidade de “evitar desprazarse á oficina ou ao rexistro para interactuar coa Administración”.

O servizo ‘A Administración, preto de ti’ é unha iniciativa do Goberno central que achega sesións informativas arredor da Administración dixital. A súa finalidade é acompañar aos veciños e veciñas no acceso a estes trámites, orientándoos na obtención de credenciais como a Cl@ve Permanente ou os certificados electrónicos, ferramentas que lles permiten relacionarse coas institucións de xeito máis áxil, seguro e autónomo.

O Concello de Cerceda presentou este venres a IV edición da carreira solidaria ‘Os 11 das vías’, que se celebrará o vindeiro 9 de maio. A proba, organizada polo Concello en colaboración co Club Atlética A Silva, o Albergue da Estación e a Federación Galega de Atletismo, visibilizará o traballo da Asociación de Cancro Infantil e Xuvenil de Galicia (ASANOG).

Á presentación acudiron o alcalde de Cerceda, Juan Manuel Rodríguez; o concelleiro de Deportes, Óscar Golán; María Docampo, de ASANOG; María José Fraga, do Club Atlética A Silva, e Miguel García, responsable do Albergue A Estación.

Ademais de dar a coñecer os detalles da cuarta edición de ‘Os 11 das vías’, tamén se fixo entrega do cheque de doazón da carreira de 2025. Neste caso, a beneficiaria é a Asociación Española contra o Cancro da Coruña, para a que se conseguiron recadar 687 euros.

‘Os 11 das vías’ abrangue tres modalidades co obxectivo de promover a práctica deportiva dun xeito solidario. A principal, de 11 quilómetros, consta de tramos de terra e asfalto e percorrerá parcialmente a Vía Verde Compostela-Tambre-Lengüelle. Os primeiros clasificados recibirán premios en metálico.

Por outra banda, organízase tamén unha andaina non competitiva de 5 quilómetros baixo o lema ‘Un paseo pola vía’, así como diversas probas adaptadas para as categorías de menores de idade.

A inscrición pode efectuarse na pasarela de pagamento Carreiras Galegas (https://www.carreirasgalegas.com/events/iv-edicin-os-11-das-vas-concello-de-cerceda/omrYYWl2) ata as 23:59 horas do 3 de maio. A participación inclúe avituallamento, agasallo conmemorativo, servizo de duchas e xogos tradicionais durante toda a tarde para entreter os máis pequenos, ademais de medallas para nenos e nenas ata a categoría sub-12. Os participantes da andaina poden apuntarse ata o 9 de maio.

Dos 6 euros da inscrición da proba principal, un irá dirixido a ASANOG, mentres que a recadación da andaina (1€ por persoa) será doada integramente á entidade. Os corredores das carreiras de menores non teñen que pagar.

ASANOG é unha entidade sen ánimo de lucro que ofrece apoio integral ás familias con menores diagnosticados de cancro. É a principal causa de morte por enfermidade nesta cohorte de idade. No marco do seu labor altruísta, a asociación ofrece atención psicolóxica, apoio educativo, asesoramento en recursos e pisos de acollida, entre outros.

O concelleiro de Deportes, Óscar Golán, resaltou “o asentamento da carreira na axenda deportiva, unha proba que, ademais, ten unha vocación solidaria” e que “combina actividade física con natureza”. Así mesmo, o edil animou “a todos os veciños, sexan de Cerceda ou doutros concellos, a que participen nesta carreira e gocen do deporte”.

O Concello de Cerceda puxo en marcha o proxecto Sendeiro peonil e ciclista entre Ribasoutas e Xermar na AC 400 (Concello de Cerceda) ao abeiro da convocatoria que regula a concesión directa de axudas para investimentos en proxectos locais singulares de enerxía limpa en concellos con desafíos demográficos (PROGRAMA DUS 5000), no marco do Programa de Rexeneración e Desafío Demográfico do Plan de Recuperación, Transformación e Resiliencia .../...

>>>Ver ou descargar documento completo

Esta semana producirse unha reunión entre o alcalde de Cerceda, Juan Manuel Rodríguez, persoal técnico do Concello e representantes da empresa Coventina Renovables. Na mesma, a empresa achegou, no prazo de 6 meses, tal e como tiña comprometido, o anteproxecto de abastecemento de auga á urbanización de Monte Xalo.

Trátase dunha obra que ascendería a día de hoxe a 219.273,94€ máis IVE, unha cifra que será integramente sufragada pola empresa no caso de que o proxecto da central hidroeléctrica de bombeo reversible vexa a luz.

O destino do aproveitamento é o abastecemento da poboación, cun caudal de auga de 12,5 litros por segundo, 45m³/h, con 8 horas de bombeo ao día. O volume máximo anual será de 43.200m³, cunhas augas que se derivarán da balsa superior da central hidroeléctrica, procedentes á súa vez do lago das Encrobas. A solución adoptada ten en conta, ademais, un posible incremento da poboación no futuro.

O citado documento describe as obras que conforman o novo abastecemento de auga á urbanización Monte Xalo coa definición necesaria para abordar o seguinte trámite: solicitar a concesión de augas para o abastecemento á poboación, segundo o regulamento do Dominio Público Hidráulico.

A actuación enmárcase nun convenio entre a empresa e o Concello de Cerceda que tamén fai fincapé en compromisos en favor da formación, do emprego local e solucións de autoconsumo para o consistorio.

O alcalde sostivo que "esta obtención é fiel a unha filosofía de equilibrio e progreso sempre presente na nosa acción política. Os proxectos enerxéticos, dentro do cumprimento en materia medioambiental e urbanística, son unha oportunidade de retorno fiscal, emprego e, en definitiva, potenciación do interese público. É unha filosofía que abandeiramos con determinación"

Segundo a empresa, “esta é unha das primeiras iniciativas que prevé desenvolver na zona, reafirmando o seu compromiso coa mellora do entorno e coa xeración dun impacto positivo na comunidade”.

O Concello de Cerceda adxudicará a substitución do céspede artificial do Campo de Fútbol do Roxo cunha previsión económica de 312.781, 94 euros, nuns traballos que mellorarán non só a usabilidade, tamén a calidade medioambiental destas instalacións.

Presenta unhas dimensións de de 105,5 metros de largo por 69,2 metros de ancho, é dicir, unha superficie total de 7.300 metros cadrados. Estímase que as obras comecen durante a tempada estival, estando preparada para comezar a tempada 2026/2027. 

Nos últimos anos avanzouse moito na tecnoloxía dos campos de fútbol artificiais, creando solucións que proporcionan sensacións máis próximas ás obtidas en campos de fútbol de herba natural, cunhas prestacións técnicas e deportivas moi boas, máis ecolóxicas e máis durables ao longo do tempo. 

O pavimento a instalar é de última xeración, deseñado para a práctica do balompé e fabricado mediante o sistema tufting en zig-zag, cosida a máquina e cun mínimo de 8150 puntadas por metro cadrado, con filamentos de céspede en verde a dúas cores. As marcas dos campos de fútbol 11 e fútbol 7 levarase a cabo segundo os criterios indicados pola RFEF e a dirección de obra. 

O alcalde de Cerceda, Juan Manuel Rodríguez, sinala que “trátase dunha intervención moi necesaria nunhas instalacións que son epicentro deportivo. Non só de Cerceda, senón da comarca. Estamos ansiosos de ver colmada esta actuación, ofrecendo así unha resposta adecuada ás necesidades e situando o complexo do Roxo nun nivel de excelencia. A burocracia é lenta, pero tal e como aconteceu e acontecerá en máis espazos, a xestión e a paciencia dan os seus froitos.”

O Concello de Cerceda vén de anunciar o inicio do proceso para rehabilitar a antiga escola unitaria de Meirama, un edificio histórico que deixou de ter uso educativo. Co obxectivo de devolvelo á vida comunitaria e garantir a súa conservación, o goberno local aposta por transformalo nun local social funcional, sostible e adaptado ás necesidades da veciñanza.

O proxecto concíbese como unha actuación integral, que incorpora a mellora da envolvente térmica, a renovación dos sistemas de climatización e a modernización da iluminación. O investimento total ascende a 90.482,41 euros, unha aposta do Concello pola rehabilitación de infraestruturas municipais e pola mellora da eficiencia enerxética. Está enmarcado no plan de rehabilitación de espazos públicos parroquiais ampliado desde o anterior mandato. 

As obras previstas inclúen a renovación completa da cuberta con tella nova, a instalación dun sistema de illamento térmico exterior, a colocación dunha bomba de calor aire-aire, a substitución da iluminación existente por tecnoloxía LED e a incorporación dun sistema de monitorización que permitirá un control eficiente do consumo eléctrico. Con estas actuacións, o edificio alcanzará os estándares actuais de confort e sustentabilidade, garantindo o seu uso social. Con estas actuacións, o Concello estima que a redución do consumo de enerxía se reducirá un 25%, así como diminuirá un 30% as emisións de CO².

O elevado ritmo inversor municipal fai que todas as parroquias se beneficien de melloras de camiños, saneamento ou infraestruturas deportivas.

Ademais de infraestruturas básicas, tamén se contemplan proxectos puntuais como a ampliación da Escola Infantil Municipal, que terá unha nova aula grazas a un investimento de máis de 180.000 euros.

As infraestruturas deportivas levan boa parte do total deste lote de investimentos, pois prevense actuacións no Outeiro, no campo de Rodís e no complexo do Roxo.

O Concello de Cerceda está a desenvolver un amplo programa de obras e melloras que abrangue
todas as parroquias do municipio, cunha planificación que combina actuacións en servizos básicos, infraestruturas viarias, equipamentos deportivos e recursos educativos. Trátase dun esforzo inversor que supera os 1,88 millóns de euros e que materializa o compromiso municipal cunha modernización continua do territorio, garantindo que cada núcleo veciñal conte con mellores condicións de vida e servizos máis eficientes.

Cada proxecto —que neste momento están en execución, recentemente rematadas ou que están nos últimos trámites de contratación — responde a necesidades detectadas no día a día e avanza na liña dun concello cohesionado, ben comunicado e dotado de instalacións modernas e sostibles.

Entre as actuacións executadas e previstas destaca o proxecto de accesos a Abelleira e Boedo (Queixas) e a mellora das pluviais no Brazal de Abaixo, cun investimento global de 127.283,62 euros, que abrangue labores de pavimentación, instalación dunha nova rede de abastecemento, execución dun muro de contención e melloras no sistema de recollida de augas pluviais.

No ámbito da mobilidade rural, o Plan Camiña Rural 2025–2026 permitirá a mellora da pista de Campo Xesteda ao cruce da Brea e doutros camiños en Xesteda, cun investimento total de 82.567,98 euros, destinado a reforzar firmes, acondicionar marxes e asegurar unha circulación máis cómoda para residentes e vehículos agrícolas.

Nesta mesma liña trabállase tamén na ampliación e mellora dun importante acceso ao núcleo urbano de Cerceda, como é o caso de Sobredafonte, cun importe de 102.077,23 euros, que inclúe
movementos de terra, melloras estruturais, novos sistemas de drenaxe e reposicións de pavimento. Pola súa banda, o proxecto de mellora do camiño das Encrobas, a pista de Piñeiro a Sandián (Rodís) e o muro de Picardel (Meirama) -xa contratado para o próximo inicio- supón un investimento conxunto de 38.013,67 euros, destinado á pavimentación, á mellora da drenaxe e á execución dunha nova estrutura de contención.

Tamén se inclúe o proxecto de abastecemento en Vilamarta (Rodís), cun investimento de 34.119,91 euros, que permitirá renovar a rede de distribución de auga potable mediante nova canalización, instalación de válvulas e reposición de pavimentos.

A ampliación da Escola Infantil Municipal supón outro dos proxectos destacados, cun investimento de 183.358,87 euros, orientado a crear unha nova aula de 1-2 anos e mellorar a funcionalidade do centro, dando resposta á demanda crecente de prazas e reforzando os servizos educativos municipais.

O ámbito deportivo tamén concentra unha parte moi relevante do esforzo inversor. No campo de fútbol do Outeiro, prevese a instalación de novas gradas cubertas con vestiarios, almacén, cantina e aseos, cun investimento de 496.818,58 euros, modernizando por completo este equipamento. Ademais, no campo de Rodís, un recinto fundamental para a formación de fútbol do
Concello, executarase unha ampliación e mellora integral do terreo de xogo, cun importe de 184.548,68 euros, mentres que no complexo deportivo do Roxo vaise acometer a substitución total do céspede artificial, cun investimento de 312.781,94 euros, co obxectivo de ofrecer unha superficie máis segura, sostible e de mellor calidade para clubs, xogadores e usuarios.No conxunto do termo municipal tamén se están executando outras melloras viarias como as actuacións na pista da Capela a Parada -contratada desde este pasado xoves-, o acceso a Coence, o camiño a Lavandeiras e o ramal da avenida da Coruña, que supoñen un investimento de 46.674,47 euros, centrado no reforzo da capa de rodaxe e na mellora da drenaxe. A estas intervencións súmanse as obras de pluviais en Sandián (Rodís) -contratadas recentemente-, as
melloras en Cova das Andes, Vilarvello e a rúa da Gardería, cun investimento total de 73.884,78  euros, dirixido a reforzar infraestruturas hidráulicas, mellorar firmes e optimizar a seguridade
viaria. Ademais, a nova depuradora de Meirama e o saneamento en Ribasoutas están xa en execución contan cun investimento conxunto de 201.266,67 euros, que permitirá avanzar no tratamento de augas residuais e na eficiencia ambiental dos sistemas de saneamento municipal.

O Concello de Cerceda mantén así un ritmo de actuacións intenso e constante, cunha planificación que garante que cada parroquia reciba investimentos e melloras estruturais, reflectindo unha visión de crecemento equilibrado e sostible. Este conxunto de intervencións
confirma o compromiso municipal cun territorio máis moderno, accesible e preparado para afrontar os desafíos futuros, reforzando a calidade de vida da veciñanza e consolidando o avance continuo de Cerceda como un concello dinámico e en permanente evolución.

Attachments:

File
Obras Cerceda 1.jpeg