Noticias
- Categoría: Noticias
DECRETO DA CONCELLEIRA DELEGADA
Dada conta da convocatoria de Prazas da Escola Infantil Municipal Os Pillabáns de Cerceda para o curso 2026/2027.
Visto o informe–proposta elaborado pola coordinadora de servizos sociais do Concello de Cerceda no que se propón a listaxe de admitidos e a listaxe de agarda para o curso 2026/2027, para cada unha das unidades.
.../...
>>> Ver ou descargar listaxe (pdf, 118K)
| File |
|---|
 LISTAXE PROVISIONAL DO ALUMNADO ADMITIDO. CURSO 2022-2023.doc |
- Categoría: Noticias
O Concello de Cerceda culminou a renovación de dous viais clave na parroquia de Xesteda, a pista dende Campo Xesteda cara a Cruce da Brea e a pista ao monte. Este luns tivo lugar a entrega das dúas intervencións, que supuxeron un investimento total de 79.220 euros financiados cunha axuda da Axencia Galega de Desenvolvemento Rural (Agader).
Na pista de Campo Xesteda a Cruce da Brea, actuouse sobre un tramo de 940 metros e catro de ancho. Limpáronse as gabias en ambas marxes e mellorouse a capa de rodaxe con aglomerado asfáltico. Así mesmo, aplicouse sinalización horizontal e engadiuse un sinal de stop.
Na pista ao monte, a intervención abrangueu dous treitos de 540 e 160 metros, é dicir, un total de 660 metros, así como un entronque de 15x7 metros. Neste caso, mellorouse o firme cunha capa de zahorra e engadiuse un sinal de stop.
O alcalde de Cerceda, Juan Manuel Rodríguez, supervisou as actuacións xunto coa tenente de alcalde, Catrina Queijo, e o concelleiro de Medio Rural, Ángel Gestal. O rexedor valorou que “desde o Concello seguimos mellorando a mobilidade e a seguridade viaria nas parroquias con actuacións como esta en Xesteda”.
Rodríguez subliñou que actuacións coma esta son esenciais para o goberno municipal: “Temos unha extensa rede de estradas municipais que debemos coidar e mellorar para garantir as boas conexións que temos”.
- Categoría: Noticias
A Xunta volve poñer en marcha o programa Benestar en Balnearios. Unha experiencia de lecer e saúde destinada aos maiores de Galicia.
Estadías de 10 días en réxime de pensión completa (aloxamento, almorzo, comida e cea) a escoller entre 15 balnearios de Galicia, quendas desde 15 xullo ata o 31 de decembro de 2026.
Dirixido a persoas maiores de 60 anos (ou pensionistas maiores de 55) e un ou dous acompañantes.
Prazo de inscrición: do 27 de maio ao 27 de xuño de 2026.
Máis información: 981 68 60 68
- Categoría: Noticias
O Concello de Cerceda acolleu hoxe a quinta edición da Poseidon Race, unha das carreiras de obstáculos máis destacadas do calendario nacional e europeo. A proba, organizada polo club OCR Cerceda coa colaboración do Concello de Cerceda e da Deputación da Coruña, reuniu preto de 1.000 participantes nun esixente circuíto con saída e meta no Aquapark. Na categoría Elite venceron Rubén García e Magali Hayen.
A competición desenvolveuse nas inmedacións do parque, atravesando espazos como o xardín botánico ou o o paseo fluvial. Cerceda converteuse nun referente do deporte OCR durante toda a xornada, cunha cita que xa está entre as grandes probas deportivas da primavera en Galicia.
A Poseidón Race contou coas categorías Elite, Starter e Popular, adaptadas a diferentes niveis de dificultade. A categoría Elite, puntuable para as ligas Nacional AOCO, North Finals e para a clasificatoria do campionato do mundo OCRWC, afrontou un percorrido de 10 quilómetros e 70 obstáculos. Pola súa banda, a categoría Starter (popular competitiva) completou 8 quilómetros e 53 obstáculos, mentres que a modalidade Popular contou cun trazado de 8 quilómetros e 48 obstáculos.
Nas categorías populares participaron máis de 500 atletas, mentres que as probas competitivas reuniron deportistas chegados de diferentes puntos de España e tamén doutros países como Portugal, Venezuela, Colombia, Estonia, República Checa ou Polonia, entre outros. A elevada participación e o nivel competitivo volveron situar a Cerceda no mapa europeo das carreiras de obstáculos.
- Categoría: Noticias
En cumprimento do Plan galego de estatística 2022-2026 (Lei 16/2021, do 20 de decembro, DOG nº 249 do 29 de decembro de 2021) este Instituto está a realizar a operación estatística “Enquisa estrutural a fogares”.
A enquisa diríxese a 9.216 vivendas de toda Galicia. Informámolos de que neste concello hai vivendas seleccionadas para participar. Estas vivendas serán visitadas entre o 1 de xuño e o 21 de xuño, que é o período de enquisa neste concello, por persoal enquisador debidamente acreditado para cubrir un cuestionario estatístico .../...
- Categoría: Noticias
Unha representación do Concello de Cerceda, encabezada polo alcalde, Juan Manuel Rodríguez, comprobou o estado das obras que Adif está a executar na estación de Cerceda-Meirama. Á visita acudiron tamén as concelleiras Catrina Queijo, Cristina Capelán e María Carmen Martínez.
O obxectivo era avaliar o avance da actuación, destinada a mellorar a seguridade, a accesibilidade, a mobilidade e a interoperabilidade das instalacións ferroviarias. Os traballos forman parte dun plan de mellora impulsado por Adif xunto coas estacións de Ordes e Uxes que supera os 7 millóns de euros de investimento.
O alcalde de Cerceda, Juan Manuel Rodríguez, sinalou que estas actuacións responden parcialmente ás demandas trasladadas polo Concello nos últimos anos. “Estamos falando dunha infraestrutura que presentaba importantes carencias e que xeraba dúbidas entre as persoas usuarias, especialmente no relativo á accesibilidade e ás condicións do paso inferior”, indicou.
Na estación de Cerceda-Meirama, as actuacións inclúen a instalación de dous ascensores panorámicos para facilitar o paso entre vías, especialmente ás persoas con mobilidade reducida. Ademais, estase intervindo nas plataformas, o paso inferior, as ramplas e escaleiras.
O rexedor valorou positivamente que se estean a executar melloras na estación, aínda que advertiu de que será necesario comprobar o resultado final das actuacións unha vez rematadas: “Entendemos que vai supoñer un impulso importante para a estación e para o servizo ferroviario, pero tamén somos conscientes de que posiblemente non dea resposta a todas as necesidades existentes”.
Dende o Concello lembran que xa no ano 2023 se trasladara a Adif unha comunicación oficial advertindo das deficiencias existentes na estación. O documento ía acompañado de informes técnicos nos que se incidía nas condicións de accesibilidade e seguridade das instalacións. Especialmente, nas inquedanzas sobre a luminosidade e seguridade do paso subterráneo.
Neste sentido, o alcalde lembrou tamén que a actual estación de Cerceda-Meirama se atopa afastada dos principais núcleos de poboación do municipio. Este feito obriga a moitas persoas usuarias a desprazarse expresamente ata a infraestrutura. En resposta a esta problemática, o Concello xa executara unha senda peonil de 300 metros de longo e dous metros de ancho para mellorar o acceso.
Dende o goberno municipal reiteran que seguirán realizando un seguimento das obras e trasladando a Adif todas aquelas cuestións que consideren necesarias para garantir “o mellor servizo posible” da estación á veciñanza de Cerceda.
- Categoría: Noticias
Os campos de fútbol do Roxo converteranse na capital do fútbol base durante o 29, o 30 e o 31 de maio con máis dun milleiro de xogadores da contorna. Será na decimooitava edición do Torneo de Fútbol Base Concello de Cerceda, organizado polo Concello de Cerceda, en colaboración co Atlético Cercedense, a Federación Galega de Fútbol e a Asociación Coruñesa de Epilepsia.
Este martes tivo lugar a presentación da cita deportiva, á que asistiron o alcalde de Cerceda, Juan Manuel Rodríguez; o concelleiro de Deportes, Óscar Golán; o director das Escolas de Fútbol Municipais, Alberto Pallas, e o presidente do Atlético Cercedense, Gabriel Bello.
Na presentación revelouse que participarán, polo menos, 56 equipos pertencentes a 16 clubs dunha ducia de concellos diferentes, á espera de posibles novas inscricións. A previsión é que xoguen en Cerceda máis de 1.100 nenos e nenas ao longo de toda a competición, xa asentada como unha das citas de referencia do fútbol base na zona.
Entre as novidades salientables está a ampliación da competición a tres días, en lugar dos dous nos que se viña celebrando ata agora; e a incorporación dunha nova categoría biberón, que se suma ás de prebenxamíns, benxamíns, alevíns, infantís e cadetes.
Durante a presentación do evento, os representantes municipais e da entidade deportiva destacaron o importante labor de coordinación entre o goberno municipal, o club e os colaboradores para facer posible unha competición desta entidade. A meta final é impulsar o deporte base, fomentar os valores do compañeirismo e da convivencia nas novas xeracións.
Juan Manuel Rodríguez destacou que “para nós é moi relevante organizar un torneo de fútbol base destas dimensións, impulsar o traballo dos clubs e promover o deporte entre os nenos e nenas”. O alcalde agradeceu aos colaboradores o seu traballo e convidou á veciñanza de Cerceda e da contorna a “acudir aos campos do Roxo, que se van converter nunha auténtica festa do balompé”.
Entre os clubs que presentarán escadras, atópanse, ademais do Atlético Cercedense, a SDC Órdenes, Unión Deportiva Carral, Escolas Deportivas O Dolmen de Tordoia, Xuventude Laracha, UD Paiosaco, Trazo CF, SD Sofán, Escolas Luis Calvo, Sporting Cambre, Sporting Burgo, Bergantiños FC, San Tirso SD, Betanzos CF, Santo Estevo Abellá SDC e SD Dubra.
Así mesmo, e do mesmo xeito que se fai con outras probas deportivas, o torneo estará caracterizado polo apoio social. Nesta ocasión o Concello colabora coa Asociación Coruñesa de Epilepsia, que instalará un stand nas inmediacións dos campos de fútbol para as persoas interesadas en apoiar o seu labor.
